B’es plan vertat qu’es causa urosa
De pescar quan l’aiga es trebosa
E mès vau èster pescatèr
Que hotjador, ni saumatèr.
Non que jo lause lo triquet
D’aqueths qui pescan dab l’anquet
Mès la pena jo tròbi doça,
Pescar dehens ua bona borsa.
Anga donca la patz adromida
E per tostemps sia sepelida.
Visca l’arreproèr qui tròta:
Diu volha manténguer riòta.
Mentre que la canhòta cauda
La tèrra assecarada escauda
E l’arromic guarnish sa clòta.
Diu volha manténguer riòta.
Plus non vau héner las vivèras,
Ni plus podar las vidauguèras
Damb nòstes auloms maridadas;
Aqueras causas èi leishadas
Per quauque mardan, o cajòc;
Lo pauhic n’es ara mon jòc;
Peus palhats har la candeleta
N’es pas ma delectacion dreta.
Jo son content qu’au còr d’estiu
Haçan, peu bèth arrajadiu,
Exercici aus quate pipòts,
Aqueths adobadors capòts.
Anga lo picòish, e la gorra;
Venga per mi la sorra-borra;
Lo parrabist e parrabast
Sia ma noiritud, e mon past.
repic
Lo paraman e lo cluquet,
e croscar los ueus au truquet,
A quate pegassòts sautar
Nòtz boharòtas enclotar,
Las naus mans, l’auqueta panada,
La pèira esconuda e celada,
La bombombaina e lo pelitre,
Me plasèn quan èri belitre.
Badic-badòc que’t cai dessús,
Aqueth jòc non m’agrada plus,
Ten-te plan a l’esparbalhada,
Aquí passa temps la mainada.
Enqüara mens mon còr s’aplica
A la gran penassa rustica;
Mon cas es ara sens gran pena:
Portar la coa de padena
repic
Mon cas es ara sens gran pena:
Portar la coa de padena
Jo son vengut deu pas au tròt,
Damb lo lin èi cambiat lo bòt;
Jo n’enduri hame ni set,
Devath un mandilh d’arroset
Hèit e tescut de peu de craba
Que jo non presi pas ua raba.
Ara, d’esclòps desgansolats,
Los mens pès non van abilhats.
Au lòc d’un petapruet, pòrti
Lo gròs pototom, quan jo sòrti
De la barraca, on èi, sens clau,
Ubèrt las caishas; e quan plau,
Ma garramacha es bona bòta.
Diu volha manténguer riòta.
repic
credits
from soleu d'argent,
released May 1, 2018
tèxte: Peir de Garròs
musica: Denis Sampieri
adobaments: Gerald Kuentz
With their blend of playfulness and graduate-level instrumentation, Dorcha deftly prove that improvisational zeal and conservatory-level precision aren't mutually exclusive. Bandcamp Album of the Day Nov 16, 2020
Grizzly Bear’s classic debut gets a 15th anniversary vinyl reissue, with a digital companion featuring a bevy of remixes. Bandcamp New & Notable Jan 12, 2020